ភ្នំពេញ៖ ប្រធានគណៈកម្មាធិការជាតិរៀបចំការបោះឆ្នោត(គ.ជ.ប) លោក ប្រាជ្ញ ចន្ទ បានលើកឡើងថាលទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នៅថ្ងៃអាទិត្យ ទី៥ ខែមិថុនានេះ នឹងត្រូវផ្សព្វផ្សាយនៅល្ងាចម៉ោង៦ថ្ងៃនេះ ខណៈលទ្ធផលផ្លូវការនៃការបោះឆ្នោតនឹងត្រូវប្រកាសនៅថ្ងៃទី២៦ ខែមិថុនា ឆ្នាំ២០២២។

លោក ប្រាជ្ញ ច័ន្ទ ឱ្យដឹងថាលទ្ធផលបណ្ដោះអាសន្នដែលប្រកាសនៅម៉ោង៦ល្ងាចនេះនឹងធ្វើការផ្សាយនៅលើកញ្ចក់ទូរទស្សន៍ជាតិកម្ពុជា វិទ្យុជាតិកម្ពុជា និងផ្សាយលើហ្វេសបុកផេកផ្លូវការរបស់ គ.ជ.ប ផងដែរ។

ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តិទី៥ បានធ្វើឡើងនៅថ្ងៃទី៥ ខែមិថុនា ដោយមានពលរដ្ឋចំនួនជាង ៧លាន១សែននាក់ចូលរួមបោះឆ្នោត ដែលស្មើនឹង ៧៧,៩១%នៃចំនួនអ្នកបោះឆ្នោតសរុបជាង ៩លាន២សែននាក់។

មានគណបក្សចំនួន១៧ ចូលរួមក្នុងការបោះឆ្នោតនេះសម្រាប់តំណែងក្រុមប្រឹក្សាឃុំ-សង្កាត់ចំនួន ១១ ៦២២ ក្នុងចំណោមឃុំ-សង្កាត់ចំនួន ១ ៦៥២៕